ថ្ងៃព្រ.ហ 2/1/2025 - 2ពង្សាវតារក្សត្រ8:7-15 ហោរាអេលីសេ និងហាសែល |...

ថ្ងៃព្រ.ហ 2/1/2025 - 2ពង្សាវតារក្សត្រ8:7-15 ហោរាអេលីសេ និងហាសែល

Posted 2025-01-01 13:28:21

739

អានអត្ថបទ

^៧ឯអេលីសេ លោកបានទៅឯក្រុងដាម៉ាស នៅគ្រានោះបេន-ហាដាឌ់ ជាស្តេចស្រុកស៊ីរី ទ្រង់ប្រឈួន មានគេទូលទ្រង់ថា មើល អ្នកសំណប់របស់ព្រះបានមកទីនេះហើយ ^៨ដូច្នេះ ស្តេចទ្រង់បង្គាប់ដល់ហាសែលថា សូមនាំយកជំនូននៅដៃ ចេញទៅជួបនឹងអ្នកសំណប់របស់ព្រះ ហើយសួរដល់ព្រះយេហូវ៉ា ដោយសារលោកថា តើយើងនឹងបានជាពីជំងឺនេះឬទេ ^៩ដូច្នេះ ហាសែលក៏យកជំនូនជារបស់ប្រសើរនៅក្រុងដាម៉ាសគ្រប់មុខ ល្មមផ្ទុកលើសត្វអូដ្ឋ៤០ចេញទៅ ដើម្បីជួបនឹងលោក ក៏ទៅឈរនៅមុខលោកជំរាបថា បេន-ហាដាឌ់ ជាកូនលោក ដែលជាស្តេចស្រុកស៊ីរី ទ្រង់បានចាត់ឲ្យខ្ញុំមកសួរលោកថា តើទ្រង់នឹងបានជាពីជំងឺនោះឬទេ ^១០អេលីសេក៏តបថា ចូរទៅទូលទ្រង់វិញថា នឹងបានជាៗពិត ប៉ុន្តែព្រះយេហូវ៉ាបានសំដែងឲ្យខ្ញុំដឹងជាក់ថា ទ្រង់ត្រូវស្លាប់ជាប្រាកដវិញ ^១១នោះអ្នកសំណប់របស់ព្រះក៏ផ្តោតភ្នែក សំឡឹងមើលមុខ ហាសែល ទាល់តែខ្មាស រួចលោកក៏យំ ^១២នោះហាសែលសួរលោកថា ហេតុអ្វីបានជាលោកម្ចាស់យំដូច្នេះ លោកឆ្លើយថា ពីព្រោះខ្ញុំដឹងពីការអាក្រក់ទាំងប៉ុន្មាន ដែលអ្នកនឹងធ្វើដល់ពួកកូនចៅអ៊ីស្រាអែល គឺទីមាំមួនរបស់គេ នោះអ្នកនឹងដុតចោល ពួកកំឡោះៗរបស់គេ អ្នកនឹងសំឡាប់ដោយដាវ អស់ទាំងកូនតូចៗរបស់គេ អ្នកនឹងបោកសំឡាប់ចោល ហើយពួកស្រីៗមានទំងន់ នោះអ្នកនឹងវះពោះគេ ^១៣នោះហាសែលឆ្លើយតបថា ខ្ញុំប្របាទ ដែលទុកដូចជាឆ្កែ តើជាអ្វីដែលនឹងធ្វើការយ៉ាងធំនេះបាន តែអេលីសេឆ្លើយថា ព្រះយេហូវ៉ាទ្រង់បានសំដែងឲ្យខ្ញុំដឹងថា អ្នកនឹងបានធ្វើជាស្តេចលើស្រុកស៊ីរី ^១៤លោកក៏ចេញពីអេលីសេ ត្រឡប់ទៅឯចៅហ្វាយវិញ ដល់ហើយទ្រង់សួរថា តើអេលីសេបានប្រាប់អ្នកយ៉ាងដូចម្តេច រួចលោកទូលទ្រង់ថា លោកបានប្រាប់ទូលបង្គំថា ទ្រង់នឹងបានជាៗពិត ^១៥ដល់ថ្ងៃស្អែកឡើង ហាសែលបានយកផួយមួយជ្រលក់ទឹក ទៅខ្ទប់ព្រះភក្ត្រនៃស្តេច ឲ្យទ្រង់សុគតទៅ រួចហាសែលបានសោយរាជ្យឡើងជំនួសទ្រង់។

^{ការយល់ដឹងអំពីអត្ថបទ}

^{ហោរាអេលីសេ និងហាសែល}

នៅក្នុងពេលវេលានោះដែរ ព្រះជាម្ចាស់បានរៀបចំពួកស៊ីរីសម្រាប់ធ្វើជាគំរូក្នុងការដាក់ទណ្ឌកម្មដល់កូនចៅអ៊ីស្រាអែល។ស្ដេចបេន-ហាដាឌ់ មានជំងឺជាទម្ងន់ តែអេលីសេបានប្រាប់ថា ស្ដេចទ្រង់នឹងបានជាសះស្បើយវិញតែត្រូវស្លាប់ដោយ ហាសែល លួចធ្វើគុតទ្រង់វិញ។ក្រោយមកលោកហាសែលបានឡើងធ្វើជាស្ដេចថ្មី។វេលានោះលោកហោរា អេលីសេបានមានការកើតទុក្ខជាខ្លាំងក្រៃលែងនៅពេលបានដឹងពីទុក្ខវេទនាដែលស្ដេចហាសែល នឹងនាំមកអោយប្រជាជនអ៊ីស្រាអែល។នៅកន្លែងនេះអ្នកនិពន្ធបានសរសេរពីប្រវត្ដិសាស្ដ្រស្ដេចស្រុកយូដា និងស្រុកអ៊ីស្រាអែលវិញម្ដង។យ៉ូរ៉ាមជាបុត្រារបស់ស្ដេចយ៉ូសាផាតបានរៀបអភិសេកជាមួយនឹងបុត្រីស្ដេចអ័ហាប់ ឈ្មោះអ័ថាលាបានឡើងសោយរាជ្យនៅក្នុងស្រុកយ៉ូដា ក្រោយពីបិតាបានសុគត់។